Styrktu Birtu um rúmar 1,7 milljónir króna

Frá afhendingu styrksins. (F.v.) Matthea aðstoðarskólastjóri, Sævar Þór skólastjóri, Daníel Hrafn yngsti nemandi skólans, Gabríela Birta formaður nemendafélagsins, Elín Björg, Helena Rós og Alexander Birgir, frá landssamtökunum Birtu. Ljósmynd/Aðsend

Nemandur Grunnskólans í Hveragerði færðu samtökunum Birtu 1.750.000 króna styrk í gær, sem er ágóði af góðgerðardegi skólans sem var þann 30. nóvember síðastliðinn.

Afhendingin fór fram á árlegum gangasöng í grunnskólanum, sem heppnaðist afar vel. Nemendur og starfsfólk skólans kom saman og söng inn jólin ásamt gestum og gangandi.

Á góðgerðardeginum í nóvember seldu nemendur ýmsar afurðir sem unnar höfðu verið í skólanum. Nemendur völdu þetta árið að styrkja landssamtökin Birtu. Tilgangur samtakanna er að standa fyrir fræðslu og ýmsum viðburðum á landsvísu fyrir syrgjandi foreldra og fjölskyldur þeirra. Þá hafa samtökin einnig staðið fyrir árlegum hvíldardögum fyrir foreldra með endurnærandi hvíld að leiðarljósi.

Gabríela Birta Kristjönudóttir, formaður nemendafélagsins, og Daníel Hrafn Fannarsson, yngsti nemandi skólans, sem verður 6 ára 19. desember, afhentu Helenu Rós Sigmarsdóttur og Elínu Björgu Birgisdóttur frá Birtu táknrænt skjal fyrir millifærslu upp á 1.750.000 krónur til samtakanna.

Grunnskólinn í Hveragerði vill þakka öllum þeim sem mættu á opna gangasönginn kærlega fyrir komuna, sem og þeim sem studdu við nemendur í tengslum við góðgerðardaginn. Sérstakar þakkir fá þau fjölmörgu fyrirtæki sem studdu við verkefnið með styrkjum og gjöfum.