Í tilefni af bleikum október verður haldin styrktaræfing laugardaginn 3. október í Kraftbrennzlunni á Selfossi. Æfingin er í samstarfi við Krabbameinsfélag Árnessýslu.
Að æfingunni standa þrjár konur sem eiga það sameiginlegt að vera nemendur í viðburðastjórnun frá Háskóla Íslands á Hólum. Æfingin er hluti af náminu þeirra, að æfa sig í viðburðarhaldi.
„Okkur langaði til að halda viðburð sem væri til þess fallinn að við og samfélagið í Árborg gætum stutt við og styrkt þá mikilvægu starfsemi sem Krabbameinsfélag Árnessýslu sinnir,“ segir Margrét Birgitta Eldjárn Davíðsdóttir, ein kvennanna sem sér um að skipuleggja æfinguna, í samtali við sunnlenska.is. Auk hennar sjá Ylfa María og Guðlaug Margrét Dagbjartsdóttir um að skipuleggja viðburðinn.
Félagið nær eingöngu rekið af styrkjum
„Krabbameinsfélag Árnessýslu leggur sig fram við að veita andlegan, líkamlegan og félagslegan stuðning. Eitt af aðalhlutverkum félagsins er að veita stuðning til þeirra sem greinast með krabbamein en ekki síður til aðstandenda, því þegar kemur að krabbameini þá er enginn eyland. Félagið er nær eingöngu rekið af styrkjum og sjálfboðaliðum sem vinna óeigingjarnt starf í þágu félagsins.“
„Við töluðum við eigendur Kraftbrennzlunnar á Selfossi, þau Ástmund Sigmarsson og Helenu Guðmundsdóttir, og athuguðum hvort þau væru til í að leggja þessum viðburði lið og lána húsnæði Kraftbrennzlunnar. Þau voru fljót að svara og voru mikið til í að styðja við þetta góða og þarfa málefni.“
Markmiðið að það seljist upp á viðburðinn
Styrktaræfingin er hópæfing en allar æfingarnar verða með þeim hætti að allir ættu að geta framkvæmt þær eða í það minnsta aðlagað æfingarnar að sér.
„Æfingin sjálf verður um það bil 40 mínútur. Æfingin er fyrir öll kyn og þátttakendur frá 18 ára aldri en frá 14 ára mega börn vera í fylgd með foreldrum.“
„Við munum bjóða upp á þrjá tíma og 100 pláss í heildina. Okkar markmið er að það seljist upp á þennan viðburð og hvetjum við því fólk til að skrá sig og fá aðra með sér og taka skemmtilega laugardagsæfingu þann 3. október og um leið láta gott af sér leiða.“
„Þeir sem vilja vera með og styrkja Krabbameinsfélag Árnessýslu geta skráð sig hér eða geta haft samband við okkur í gegnum Facebook.“
„Aðgangseyrir er 3.000 krónur en frjáls framlög eru einnig vel þegin. Á staðnum verður varningur frá Krabbameinsfélagi Íslands til sölu,“ segir Margrét að lokum.
