Styrkja ungu konuna sem lamaðist í slysi á Selfossi

Styrktarreikningur hefur verið stofnaður fyrir Ágústu Örnu sem lamaðist þegar hún féll niður um op á neyðarútgangi á þriðju hæð á Selfossi fyrr í vikunni.

Ágústa féll rúmlega sex metra og þykir í raun kraftaverk að hún hafi lifað fallið af. Hún höfuðkúpubrotnaði, kinnbeinsbrotnaði og hlaut slæmt hryggbrot. Þá skaddaðist mænan svo mikið að hún er lömuð frá brjósti.

Hún er nú komin úr öndunarvél og getur tjáð sig við fjölskyldu sína sem er hjá henni öllum stundum. Ljóst er að hún á langa og erfiða baráttu fyrir höndum sem auk þess að taka á líkamlega og andlega, mun reynast fjölskyldunni fjárhagslega erfið.

Margt smátt gerir eitt stórt og því hefur verið stofnaður styrktarreikningur fyrir Ágústu Örnu til þess að aðstoða hana og fjölskyldu hennar í þeirri baráttu sem framundan er. Reikningsnúmerið er 0325-13-110203 og er kennitala hennar 270486-3209. Reikningurinn er hjá Arion banka og mun Róbert Sverrisson, viðskiptafræðingur hjá bankanum, vera fjármálastjóri söfnunarinnar.