Nemendur og starfsfólk Grunnskólans í Hveragerði afhentu í morgun félaginu Einstökum börnum tæpar 2,2 milljónir króna, sem er afrakstur góðgerðardags í skólanum.
Undanfarin ár hafa nemendur og starfsfólk í GíH haldið þemadaga til að efla samkennd nemenda og láta um leið gott af sér leiða. Þrír dagar fara í vinnu, þar sem ýmsar vörur eru útbúnar og þær eru svo seldar á góðgerðardegi, sem haldinn var föstudaginn 2. desember síðastliðinn. Markaðstorg var opið öllum í íþróttahúsinu og einnig sáu nemendur á elsta stigi um kaffihús í mötuneyti skólans fyrir gesti.
Ágóðinn af góðgerðardeginum hefur farið í gott málefni undanfarin átta ár en meðal styrkþega síðustu ár eru styrktarfélögin Dropinn, Neistinn, Birta og Barnaspítali Hringsins. Það er stór ákvörðun hvert ár hvaða starfsemi á að styrkja og er sú ákvörðun að mestu lögð í hendur nemenda. Í öllum bekkjum fer fram umræða um hvaða starfsemi á að styrkja og síðan er lögð könnun fyrir hvern bekk. Kosning um hugmyndir nemenda fer einnig fram meðal starfsfólks og í ár var það sameiginleg niðurstaða starfsfólks og nemenda að styrkja Einstök börn, stuðningsfélag barna og ungmenna með sjaldgæfa sjúkdóma eða sjaldgæf heilkenni.
Nishadi U. Weerasooriya, formaður nemendaráðs og Maríus Blær Irpu Davíðsson, yngsti nemandi skólans, afhentu Öddu Maríu Óttarsdóttur, fulltrúa Einstakra barna í morgun styrk að fjárhæð 2.184.000 króna.
Þau málefni sem skólinn hefur styrkt hingað til hafa verið valin með tilliti til þess að börn njóti á einhvern hátt góðs af styrknum. Meginstefið hefur þannig verið að börn styrki börn. Umtalsverðar fjárhæðir hafa safnast á þessum árum með sölu á vörum og eins hafa fjölmörg fyrirtæki stutt við bakið á söfnuninni með beinum peningastyrkjum.