Hátíðin Flúðir um Versló verður haldin í ellefta skipti nú um helgina. Bessi Theodórsson, verkefnastjóri hátíðarinnar, á von á miklum mannnfjölda enda er helsta breytingin frá síðustu árum sú að nú verður boðið upp á brakandi blíðu um helgina.
„Veðrið spilar að sjálfsögðu stóran þátt í þessu og miðað við spána þá sjáum við fram á einhverja flottustu hátíðina veðurlega séð í nokkur ár. Það er strax kominn gríðarlegur fjöldi fólks hingað á Flúðir og við erum klár í slaginn,“ sagði Bessi í símaviðtali við sunnlenska.is í morgun, þar sem hann spókaði sig á sólpallinum á Grund.
„Annars verður dagskráin með nokkuð svipuðu sniði og áður, laugardagurinn er eðlilega langstærstur en við erum á þeirri vegferð að hafa hátíðina passlega stóra. Þetta er fjölskylduhátíð þar sem allir finna eitthvað við sitt hæfi.“
Bessi hvetur gesti sem ætla sér að vera á ferðinni um Uppsveitirnar til þess að mæta tímanlega á laugardaginn.
„Einfaldlega svo að þeir festist ekki í bílaröð, sama hvort það er undir Miðfelli eða á leiðinni úr Bláskógabyggð. Við minnum líka á að það eru safnbílastæði við íþróttahúsið og reiðhöllina og þaðan er steinsnar að rölta í Torfdal á traktoratorfæruna og sláttutraktorarallýið.“