Fyrir skömmu veiktist Birna Viðarsdóttir á Norður-Hvoli í Mýrdal alvarlega af kampýlóbakter, en hún smitaðist af bakteríunni við að halda á stormmávsunga.
Viku eftir að Birna hafði haldið á unganum var búið að leggja hana inn á sjúkrahús með næringu og tvenns konar sýklalyf í æð. Þar lá Birna fárveik í fjóra daga.
„Ég byrja að finna á mánudeginum í síðustu viku að ég væri orðin eitthvað skrítin. Svo verð ég alltaf lasnari og lasnari og á fimmtudeginum byrja ég að æla og með pípandi niðurgang. Á föstudeginum fer ég á heilsugæsluna í Vík og þá kemur í ljós að ég er með mikla sýkingu og fer beint á bráðamóttökuna á Selfossi. Þar var ég svo frá föstudegi til mánudags með tvenns konar sýklalyf í æð og vökva og það bara rann aftur af mér,“ segir Birna í samtali við sunnlenska.is.
Umræddur stormmávur hafði gert sér hreiður á haugsugunni hennar Birnu. Hreiðrið er ekki nema 200 m frá íbúðarhúsinu þeirra og þar sem Birna er mikil fuglaáhugamanneskja, gat hún ekki stillt sig um að halda á einum unga. Örfáum dögum efir að Birna hélt að unganum fór hún að finna fyrstu einkennin.
Óþægilegt að vita ekki orsök veikindanna
Til að byrja með var það mikil ráðgáta hvar Birna hafði smitast af bakteríunni.
„Læknarnir voru svo mikið að spá hvar ég hefði fengið þessa bakteríu, hvort ég hefði verið í útlöndum eða hvar ég hefði getað náð í þetta. Og hvort ég hefði verið að borða eitthvað sérstakt en nei nei, það passaði ekki.“
„Þegar lækarnir útskrifuðu mig þá spurði ég þá hvort ég hefði smitast útaf einhverju sem ég hefði látið ofan í mig eða af einhverjum. Þau sögðust hreinlega ekki vita það. Það fannst mér svolítið óþægileg tilfinning, að vita ekki hvað maður fær svona bakteríu sem veldur svona miklum veikindum.“
Afleysingalæknir leysti gátuna
Birna fór svo til afleysingalæknis í Vík síðastliðinn mánudag þar sem henni fannst hún ekki vera orðin nógu hress.
„Læknirinn sem ég hitti hafði áhuga á því hvernig ég hefði smitast og ég sagði að læknarnir hefðu ekki fundið það út. Hann spyr mig hvort ég hafi farið til útlanda og ég svara því neitandi. Þá verður hann hugsi og spyr mig svo hvort ég hafi verið að umgangast máva. Þá tók ég nú fyrir andlitið og sagði jú, ég væri sko búin að umgangst máva, búin að vera í þessu stormmávshreiðri, að halda á ungunum og vesenast með þá. Og hann bara smellti fingrum og sagði gátan er leyst!“
„Ég er óskaplega þakklát að barnabarnið mitt, sem var með mér að skoða hreiðrið, vildi ekki halda á ungunum þegar ég bauð honum það. Ég vara mig á dauðum fuglum og veikum fuglum en ég hefði aldrei haldið að ungarnir gætu verið hættulegir. Þegar ég fór svo að gúgla þá sá ég að mávfuglar geta borið þessa bakteríu með sér.“
Lætur sér nægja að mynda fugla hér eftir
Sem fyrr segir er Birna mikil fuglaáhugamanneskja. Hún hefur verið dugleg að taka myndir af þeim í gegnum tíðina og þykir afar lunkinn ljósmyndari. Aðspurð hvort hún muni einhvern tímann halda aftur á fuglsunga svarar Birna hlæjandi. „Ég efast um það. Ég held að ég láti mér nægja hér eftir að mynda þá,“ segir Birna en þess má geta að hún er 71 árs og hefur því töluverða reynslu af því að umgangast fugla.
„Ég hef aldrei verið nálægt mávsungum fyrr. Þessi stormmávur er svolítið merkilegur útaf fyrir sig, því að þetta er fyrsti stormmávurinn sem verpir í Vestur-Skaftafellssýslu, svo vitað sé. Ævar fuglafræðingur er búinn að vera í sambandi við mig útaf þessum fugli, sem gerir þetta ennþá meira spennandi fyrir mig að fylgjast með, “ segir Birna og hlær. „Læknirinn sagði samt við mig að ég ætti ekkert að hætta að halda á ungum en passa að þvo mér strax um hendurnar.“
Áttaði sig ekki strax á alvarleika veikindanna
„Ég hef alltaf haft svo ofsalega gaman af fuglum. Það er svo ofboðslega mikið af hreiðrum alls staðar hérna núna. Bara þegar ég lít út um gluggann núna þá eru hrossagaukshjón með tvo unga að kenna þeim að draga upp ánamaðka. Það er svo gaman að fylgjast með þessu en maður þarf ekki endilega að halda á þeim, það er annað mál,“ segir Birna og hlær dátt.
„Ég fattaði ekki fyrr en ég kom heim hvað þetta hafði verið alvarlegt. Heilsan er fín núna, þetta er allt að koma. Ég var að fá niðurstöður úr blóðprufunum sem staðfesti að ég væri ekki með neina sýkingu lengur. Ég vil biðja fólk um að fara varlega í kringum fuglana, sérstaklega mávfuglana. Litlir saklausir ungar geta borið með sér alls konar,“ segir Birna að lokum.