Nýtt og glæsilegt saunasvæði var formlega opnað í Sundhöll Selfoss í dag. Nýja aðstaðan leysir af hólmi einn lítinn saunaklefa en nú er þar stór saunaklefi, stór innrauð sauna og kaldur pottur auk slökunarrýmis.
Kostnaður við framkvæmdirnar var um 45 milljónir króna sem skiptast jafnt á milli Sveitarfélagsins Árborgar og líkamsræktarstöðvarinnar World Class. Björn Leifsson, eigandi World Class, klippti á borða í dag og opnaði svæðið formlega.
Magnús Gísli Sveinsson, forstöðumaður sundstaða Árborgar, sagði í ávarpi að þetta væri ánægjulegur áfangi og kærkomin viðbót við þá aðstöðu sem til staðar er í Sundhöllinni.
„Frá því World Class opnaði hér árið 2015 hefur umferð í húsið aukist gríðarlega. Gestafjöldinn árið 2016 var um 240 þúsund, þar af voru gestir World Class um 106 þúsund. Heildarfjöldi síðasta árs var um 400 þúsund gestir og þar af eru 157 þúsund iðkendur í World Class,“ sagði Magnús.
Bragi Bjarnason, bæjarstjóri Árborgar, sagði að samstarfið við World Class hefði gengið vel og einnig í þessari stækkun á saunaaðstöðunni.
„Þegar þessi hugmynd kom fram að endurnýja þyrfti saunaklefann þá fengum við fyrirspurnir um það frá fastagestum og fleiri hvort ekki væri hægt að stækka klefann. Nú eru aðrir tímar og saunamenningin hefur aukist mikið. Við fengum World Class til þess að koma að þessu með okkur enda hafa þau góða reynslu í þessum efnum og útkoman er góð og ávinningur fyrir báða aðila að vinna þetta saman,“ sagði Bragi.
