Ráðist verður í gagngerar endurbætur og stækkun húsnæðis fyrir sjúkrahússþjónustu og heilsugæslu við Heilbrigðisstofnun Suðurlands á Selfossi.
Reist verður rúmlega 5.200 fermetra viðbygging til að mæta aukinni húsnæðisþörf og farið í gagngerar endurbætur og endurskipulagningu á meiri hluta eldra húsnæðis stofnunarinnar. Verkið verður unnið í þremur áföngum.
Fyrsti áfanginn felst í endurnýjun og stækkun húsnæðis heilsugæslu, geðteymis og heimahjúkrunar. Sá áfangi er full fjármagnaður, heimild Samstarfsnefndar um opinberar framkvæmdir liggur fyrir og því unnt að hefja vinnu við hann strax. Áætlað að ljúka framkvæmdum við fyrsta áfangann um mitt ár 2027.
„Sú áætlun sem hér liggur fyrir um stækkun, endurbætur og endurskipulag húsnæðis HSU boðar nýja tíma í starfsemi stofnunarinnar og gerir henni kleift að þróast og dafna. Húsnæðið er vissulega ekki allt, en það getur haft mikil áhrif á öryggi og gæði þjónustunnar með góðum aðbúnaði sjúklinga og vandaðri og vel skipulagðri vinnuaðstöðu starfsfólks. Það sýnir sig líka að góðar vinnuaðstæður auka starfsánægju sem styður við mönnun starfseminnar,“ segir Alma D. Möller heilbrigðisráðherra.
Endurnýjun og stækkun húsnæðis HSU á Selfossi er brýn og löngu tímabær. Eldri hluti húsnæðisins, um 3.800 m² er frá árinu 1981 en nýrri hluti þess, um 5.000 m² var tekinn í notkun árið 2008. Viðhalds- og endurnýjunarþörf er uppsöfnuð. Vegna aldurs húsnæðisins uppfyllir skipulag og hönnun þess ekki nútíma kröfur um öryggi og gæði þjónustunnar. Vinnuaðstaða starfsfólks er víða þröng og hluti skrifstofustarfs fer fram í gámaeiningum á lóð HSU.
Íbúum á Suðurlandi hefur fjölgað hratt á síðustu árum og álag á heilbrigðisþjónustu hefur aukist vegna mikillar ferðaþjónustu og umfangsmikillar frístundabyggðar. Samkvæmt frumathugun þarf að fjölga sjúkrastofum úr 20 í allt að 40. Þá þarf að endurskipuleggja og/eða stækka húsnæði bráðamóttöku, göngudeilda, myndgreiningar, rannsókna, fæðingarþjónustu, geðheilbrigðisþjónustu, heilsugæslu, heimahjúkrunar og skrifstofu yfirstjórnar. Heildarþörf húsnæðis er metin um 11.000 m² en er nú um 8.800 m². Starfsmenn HSU eru nú um 850 í 604 stöðugildum en áætlað er að þeim fjölgi um allt að 20% á næstu tíu árum.
„Þessar fréttir eru svo sannarlega gleðiefni. HSU þjónar stóru og fjölbreyttu svæði og hefur starfsemi stofnunarinnar vaxið hratt samhliða fjölgun íbúa og aukinni umferð ferðamanna. Fyrirhugaðar framkvæmdir skipta því miklu máli, ekki bara fyrir húsnæðið sjálft, heldur fyrir þá þjónustu sem við viljum af heilum hug geta veitt til framtíðar,“ segir Díana Óskarsdóttir, forstjóri Heilbrigðisstofnunar Suðurlands.
Áfangaskipting heildarframkvæmda
1. áfangi: Endurbætur á vesturálmu undir heilsugæslu á 1. hæð og heilsugæslu og geðheilsuteymi á 2. hæð.
2. áfangi, ný norðurálma: Nýbygging fyrir legudeildir, bráðamóttöku, myndgreiningu, fæðingarþjónustu og mæðravernd, alls 5.240 m².
3. áfangi: Endurbætur á austurálmu; göngudeildir, skrifstofur, mötuneyti og kjallari.
Áætlaður heildarkostnaður allra þriggja áfanganna á stigi frumathugunar nemur á bilinu 8,5 til 13 milljörðum króna (vikmörk -15% til + 30%). Í tímaáætlun Framkvæmdasýslunnar – Ríkiseigna (FSRE) er gert ráð fyrir að öllum framkvæmdum gæti verið lokið árið 2034.