Lögreglan á Suðurlandi rannsakar stórfelld skemmdarverk sem unnin voru á undirlaginu fyrir nýjan gervigrasvöll Hvergerðinga uppi í Dal um helgina.
Ekið var inn á svæðið, í gegnum girðingu, spólað og undirlagið spænt upp. Í tilkynningu frá Hveragerðisbæ segir að málið hafi verið tilkynnt til lögreglu sem hefur það til rannsóknar.
Hvergerðingar láta þetta ekki stöðva sig. „Unnið verður hratt og örugglega að endurbótum með verktakanum og í kjölfarið verður gervigrasið lagt á og völlurinn vígður,“ segir í tilkynningunni.
