Stóragerði breytt í Sjússamýri

Eins og glöggir vegfarendur á Hvolsvelli hafa tekið eftir hefur gatan Stóragerði fengið nýtt nafn og heitir nú Sjússamýri.

Horfið hefur verið til gamalla tíma í tilefni þess að íbúar Stóragerðis sjá um þorrablót Hvolhreppinga nú í ár og því heitir gatan nú Sjússamýri.

Þegar íbúar Stóragerðis héldu blót áður fyrr þá fékk gatan þetta nafn og hús við götuna fengu einnig góð og gild heiti eins og Landalækur, Koníakskot, Vodkaver, Sjennastaðir og Glasabakki.

Þorrablót Hvolhreppinga fer fram í Hvolnum þann 2. febrúar næstkomandi.