Jarðskjálfti af stærðinni 4,1 mældist við Nesjavelli klukkan 00:36 í nótt og fannst vel á Suðvesturhorni landsins.
Skjálftanum hefur fylgt minniháttar eftirskjálftavirkni. Upptök hans voru undir hlíðum Dyrafjalla, rétt vestan við Nesjavelli.
Þetta er stærsti skjálftinn á Nesjavöllum síðan 1998 þegar mældist skjálfti af stærð 4,6 á svipuðum slóðum.
Í tilkynningu frá Veðurstofunni segir að jarðskjálftavirkni sé algeng á svæðinu.