Stór jarðskjálfti reið yfir suðvesturhorn landsins fyrir nokkrum mínútum, klukkan 13:45. Samkvæmt fyrstu upplýsingum frá Veðurstofunni mældist skjálftinn 4,5 að stærð og voru upptök hans á 4,5 km dýpi vestan við Húsmúla í Ölfusi, norðan við þjóðveginn í Svínahrauni.
Skjálftahrina hefur verið í gangi á þessum slóðum síðan í gærmorgun. Alls hafa rúmlega 500 skjálftar mælst síðan þá, sá stærsti um 3,3 að stærð kl. 17:15 í gær og nokkrir aðrir rétt undir 3 að stærð.
Stóri skjálftinn fannst vel, víða á Suðurlandi en sunnlenska.is hefur fengið tilkynningar um hann frá höfuðborgarsvæðinu, Nesjavöllum, Þorlákshöfn, Selfossi og allt austur á Hellu. Á skrifstofu sunnlenska.is á Selfossi hrikti vel í stoðum og stóð skjálftinn yfir nokkuð mjúklega í nokkrar sekúndur.
Skjálftar og skjálftahrinur eru nokkuð algengar á þessu svæði, síðast varð álíka hrina í júní 2024. Sprungusvæðið er hluti Brennisteinsfjalla/Bláfjallakerfisins.
Veðurstofan minnir á fólk að huga að viðbrögðum vegna jarðskjálfta, sjá nánar á heimasíðu Almannavarna: Viðbrögð við jarðskjálfta
