Stór hópur úr Flúðaskóla mun fara í skimun vegna COVID-19 næstkomandi þriðjudag og mun skimunin fara fram í félagsheimilinu á Flúðum.
Ákveðið hefur verið að framlengja lokunum í Hrunamannahreppi en Flúðaskóli verður lokaður á mánudag og þriðjudag og það sama á við um sundlaugina, íþróttahúsið og tækjasalinn.
Óskað er eftir því að foreldrar leikskólabarna haldi börnum sínum heima ef þess er nokkur kostur og komi ekki með þau í leikskólann fyrr en niðurstöður skimana liggja fyrir.
Skrifstofa og áhaldahús Hrunamannahrepps verða lokuð öðrum en þeim sem þar starfa. Bókasafnið verður lokað á mánudag og þriðjudag.
Margir íbúar í Hrunamannahreppi eru í sóttkví, sem hefur áhrif á mönnun og starfsgetu stofnana sveitarfélagsins.