Um næstu helgi á lögreglan á Suðurlandi von á fjölda fólks vegna nokkurra viðburða í umdæminu. Má þar nefna Kótelettuna á Selfossi, Laugavegshlaupið sem endar í Þórsmörk og flughátíðina Allt sem flýgur sem haldin verður á Hellu.
Lögregla vill biðja alla þá sem hyggjast á ferðalög um helgina að sýna þolinmæði og tillitssemi í umferðinni og veita gangandi umferð sérstaka athygli en gera má ráð fyrir fjölda gangandi vegfarenda á Selfossi í tengslum við tónlistar- og fjölskylduhátíðina.
Lögreglan hvetur fólk til að fylgjast vel með og passa upp á samferðarfólk sitt. Örugg skemmtun er góð skemmtun og í neyð hringið í 112.