Guðríður Aadnegard, umsjónarkennari og námsráðgjafi í Grunnskólanum í Hveragerði, hlaut í dag hvatningarverðlaun samtakanna Heimili og skóli á árlegum Degi gegn einelti.
„Einelti er félagslegt vandamál og getur haft alvarlegar afleiðingar. Við vitum að tengsl eru á milli skólabrags og tíðni eineltis. Með þessa vitneskju í farteskinu höfum við starfsfólkið í Grunnskóla Hveragerðis lagt mikla áherslu á að skapa þægilegt andrúmlegt og stuðla að jákvæðum og góðum skólabrag,“ sagði Guðríður, þegar hún veitti verðlaununum viðtöku.
Sú hefð hefur skapast að verðlaunin eru afhent þeim einstaklingi sem talinn er haft lagt mikið af mörkum til að gera samfélagið betra. Handhafi Hvatningarverðlaunanna er valinn úr innsendum tilnefningum til fagráðs eineltismála hjá Mennamálastofnun.
Klapp á bakið er næg hvatning
Verðlaunaafhending fór fram í Rimaskóla í Grafarvogi í morgun og þar afhenti Lilja D. Alfreðsdóttir, mennta- og menningarmálaráðherra, Guðríði verðlaunin. „Verðlaunin eru hvatning til náms- og starfsráðgjafa og umsjónarkennara til góðra verka. Þessir starfsmenn bera iðulega hita og þunga í eineltismálum. Guðríður hefur unnið frábært starf og ávallt beitt árangursríkum aðferðum,“ sagði Lilja.
Guðríður sagði í ávarpi sínu heiður að taka við verðlaununum og sagðist mætt sem fulltrúi starfsmanna og nemenda Grunnskólans í Hveragerði.
„Bros á tárvotu andliti, hlýlegt handtak foreldra, klapp á bakið frá stjórnendum og samstarfsfólki hefur verið mér næg hvatning og sönnun þess þess að sennilega er ég að gera rétt. Ég er í skemmtilegasta starfi í heimi. Það hefur gefið mér mikið og það hefur aldrei hvarflað að mér að ég hafi valið mér vitlausan starfsvettvang. Ég er afar stolt af því að starfa með börnum og ungmennum og geta lagt þeim lið þegar á bjátar,“ sagði hún og lýsti virkum samskiptum kennara við nemendur skólans og foreldra og forráðamenn þeirra með það fyrir augum að kanna líðan nemenda.
„Ég tel það lykilatriði upprætingu eineltis í skólanum að þar eru formleg foreldraviðtöl á hverjum vetri. Við byrjum haustið á foreldraviðtölum. Í viðtölin mæta nemendur með foreldrum eða forráðafólki. Í október og mars hringjum við í foreldra og ræðum sérstaklega við þau um líðan nemendanna,“ sagði hún en lagði áherslu á að helstu áhyggjurnar sem hún hafi sé hvernig hægt er að taka með markvissum hætti á neteinelti.
„Þar þarf að stíga með afgerandi hætti inn og vinna með okkur í skólunum að því að berjast af alefli gegn því. Foreldrar þurfa allir sem eitt, að huga að netnotkun barna sinna og ungmenna og mögulega grípa til þess ráðs að setja mörk á notkunin.“
Frá verðlaunaafhendingunni er greint á heimasíðu UMFÍ en Guðríður er jafnframt formaður Héraðssambandsins Skarphéðins. UMFÍ er eitt af fjórum aðildarfélögum Æskulýðsvettvangsins en á meðal verkefna hans er að vinna gegn einelti.