Steytti á skeri og synti í land

Hjálparsveitin Tintron í Grímsnesi og Björgunarsveitin Ingunn á Laugarvatni voru kallaðar út rétt eftir klukkan tíu í kvöld vegna báts sem sat fastur á skeri undan Skálabrekku, vestanmegin í Þingvallavatni.

Í bátnum, sem er harðbotna mótorbátur, var maður sem hafði verið á siglingu á vatninu þegar hann steytti á skerinu, nokkuð harkalega að því er virðist þar sem báturinn var nánast á þurru.

Kona sem var með honum í bátnum synti í land, um 70-100 m leið, til að hringja eftir hjálp þar sem hvorugt þeirra var með síma.

Björgunarsveitarmenn voru komnir að manninum á skerinu klukkan 23:10 og fluttu þeir hann í land.

Báturinn var skilinn eftir enda heftir myrkur athafnir á vatninu sem stendur.