Framkvæmdir við nýju Ölfusárbrúna ganga vel. Steypuvinnu við brú á nýjum mislægum gatnamótum austan við Selfoss er lokið og samsetning stálbita nýju brúarinnar yfir Ölfusá er á áætlun. Um 65 starfsmenn vinna nú á framkvæmdasvæðinu.
Mislægu gatnamótin austan við Selfoss eru farin að taka á sig góða mynd, þar verða tengingar að golfvellinum og Laugardælum annars vegar og Gaulverjabæjarvegi hins vegar. Uppsteypu brúarinnar er lokið og nú er unnið að gerð sigplatna og frágangi.
Allir stálbitarnir í brúargrind nýju Ölfusárbrúarinnar hafa nú verið fluttir til landsins. Skipið sem flutti seinni hluta stálbitanna kom til Þorlákshafnar 4. júní og hefur megnið af bitunum þegar verið flutt á verkstað austan árinnar. Þar er unnið að samsetningu brúarinnar. Tengingar eru rafsoðnar og að því loknu er yfirborðið sandblásið, galvaniserað og málað með grunni og lokamálningu.
Stálið í turninn væntanlegt í ágúst
Í Efri-Laugardælaeyju hefur neðri hluti undirstaða brúarturnsins verið steyptur og nú er unnið að uppslætti og járnbendingu fyrir efri hluta þeirra. Áætlað er að stálið í brúarturninn verði flutt til landsins í ágúst. Það er framleitt í verksmiðjum Norvik í Póllandi.
Áætlað er að nýja Ölfusárbrúin verði tilbúin haustið 2028.