„Það má draga þá ályktun að það sé gott að búa í Árborg á meðan þú þarft ekki á þjónustu sveitarfélagsins að halda.“ Þetta segja þær Halldóra Sigr. Sveinsdóttir, formaður Bárunnar stéttarfélags og Árný Erla Bjarnadóttir formaður Foss stéttarfélags í ályktun sem félögin sendu frá sér í morgun vegna uppsagna starfsmanna Sveitarfélagsins Árborgar í síðasta mánuði.
Í ályktuninni segir að fjöldi starfsmanna hafi fengið afhent uppsagnarbréf á ískaldan hátt, en misjafnt hafi verið hvernig uppsögnunum var háttað.
„Dæmi voru um að starfsfólk var látið bíða í röð eftir að mæta í viðtalsherbergi þar sem þeir sem voru á undan komu út gjörsamlega niðurbrotnir. Í einhverjum tilfellum mættu fulltrúar inn á stofnanir og sáu um framkvæmd uppsagna án þess að hafa hitt viðkomandi áður. Eina sem var í boði á þessari niðurlægjandi stund voru einhverjar kennslustundir ráðgjafafyrirtækis í að leita að vinnu,“ segir í ályktun Bárunnar og Foss, sem mótmæla harðlega framkvæmd uppsagnanna.
Í ályktuninni segir ennfremur að íbúum sé mjög brugðið og ekki sé séð fyrir endann á því hvað það eru margir sem koma til með að missa vinnuna.
„Sveitarfélögin bera ákveðnar skyldur gagnvart íbúum og samfélaginu. Hvaða áhrif mun þetta hafa á þær skyldur. Þetta er kunnuglegt stef hjá Sveitarfélaginu Árborg, því ekki er langt síðan að uppsagnir á ræstingafólki áttu að hagræða verulega í rekstri. Stéttarfélögin lýsa áhyggjum sínum yfir því að þetta bitni fyrst og fremst á konum, lágtekjuhópum, þjónustuþegum og þjónustu almennt,“ segir ennfremur í ályktuninni og því bætt við að þetta séu kaldar kveðjur frá bæjarstjórn og vægast sagt lítilsvirðing fyrir störfum þessara hópa sem starfað hafa af heilum hug.
„Því miður virðast gömul sannindi vera að raungerast enn og aftur með því að segja þeim upp sem lægst hafa launin þegar spara þarf fjármuni, en hlífa þeim sem hæstu launin hafa. Félögin skora á bæjarstjórn að finna aðrar leiðir til hagræðingar og draga uppsagnir hjá fyrrgreindum hópum til baka. Ímynd Sveitarfélagsins Árborgar hefur orðið fyrir álitshnekk,“ segir ennfremur í ályktun Bárunnar og Foss.