Jarðskjálftavirknin sem hófst í Bárðarbungu 16. ágúst heldur áfram. GPS staðsetningamælingar gefa sterkar vísbendingar um kvikuhreyfingu.
Um er að ræða jarðskjálftahreyfingar tengdar kvikuhreyfingu austur af Bárðarbunguöskjunni og við brún Dyngjujökuls skammt austur af Kistufelli.
Klukkan 02:37 í nótt varð jarðskjálfti, um 4 að stærð, við Kistufell. Það er sterkasti skjálftinn sem mælst hefur á svæðinu frá árinu 1996.
Í ljósi endurmats jarðvísindamanna á atburðum síðustu daga hefur Veðurstofan ákveðið að hækka viðvörunarstig fyrir flugmálayfirvöld og er því Bárðarbunga merkt með appelsínugulu samkvæmt litakóða.
Engin merki eru um gos. Ekki er hægt að útiloka að þessi virkni geti leitt til sprengigoss sem þá myndi valda jökulhlaupi og losun ösku út í andrúmsloftið. Náið er fylgst með þróuninni.
Í fréttum RÚV í hádeginu kom fram að það sé mat jarðvísindamanna að kvikan sé á leið upp undir skorpuna á tveimur stöðum. Einnig kom fram í fréttum RÚV að við mögulegt jökulhlaup sé fyrst og fremst horft til Jökulsár á Fjöllum.