Stefán Gunnar Stefánsson hyggst ekki taka sæti á lista Framsóknarflokksins í Árborg í komandi sveitarstjórnarkosningum. Hann sóttist eftir því að leiða listann.
Stefán Gunnar gaf kost á sér í 1. sætið fyrir prófkjör flokksins í Árborg, en stjórn framsóknarfélagsins ákvað svo í samráði við frambjóðendurna að stilla upp á listann.
„Eftir nokkra umhugsun hef ég tekið ákvörðun um að þiggja ekki sæti á lista Framsóknarflokksins í Árborg fyrir komandi sveitarstjórnarkosningar 14. maí næstkomandi,“ segir Stefán Gunnar í yfirlýsingu sem hann sendi frá sér síðdegis í dag. Hann segir að undanfarnar vikur séu sér mjög kærar og jafnframt lærdómsríkar.
„Á minni vegferð hefur mér hlotnast sá heiður að kynnast ótrúlega flottu og skemmtilegu fólki sem allt hefur það sameiginlegt að brenna fyrir hagsmunum samfélagsins, með samvinnuhugsjón að leiðarljósi og vill gera gott samfélag enn betra. Ég ótrúlega þakklátur þeim sem studdu við mig í þessu ferli og hvöttu mig til að taka slaginn. Það er ómetanlegt að upplifa á eigin skinni þegar fólk hefur fulla trú á manni og veitir manni svo mikinn stuðning. Ég vil sérstaklega þakka fyrir öll samtölin, erindin, póstana og símtölin sem ég hef átt við íbúa Árborgar á undanförum misserum. Þessi vegferð hefur gefið mér ómetanlega sýn á samfélagið sem okkur öllum þykir svo vænt um,“ segir Stefán Gunnar ennfremur.
Framsóknarflokkurinn mun kynna framboðslista sinn í Árborg eftir helgi og segir Stefán Gunnar í yfirlýsingunni að hann óski því fólki sem mun mynda þann lista, velfarnaðar og alls hið besta í komandi kosningarbaráttu.