Orsakir rafmagnsleysisins á Suðurlandi í gærkvöldi voru þær að grjót hrundi úr Ingólfsfjalli og hafnaði á staurastæðu í Selfosslínu 1 austan við Tannastaði og braut hana.
Selfosslína 1 flytur rafmagn frá Ljósafossi á Selfoss en þegar línan sló út varð útleysing í tveimur spennum í spennistöðinni á Selfossi.
Rafmagnslaust var í Árborg og stórum hluta Suðurlands í um það bil 25 mínútur.
Starfsmenn Landsnets vinna að viðgerð undir Ingólfsfjalli í dag. Greinilegt er að talsverðar leysingar eru í Ingólfsfjalli þar sem nýjar lækjarsprænur renna víða niður hlíðar fjallsins.
UPPFÆRT KL. 18:50: Viðgerð á línunnni lauk nú síðdegis og samkvæmt tilkynningu frá Landsneti var Selfosslína 1 komin aftur í rekstur um kl. 18:06.
