Starfsmenn trésmíðaverkstæðisins Selóss á Selfossi fengu uppsagnarbréf frá fyrirtækinu um síðustu mánaðarmót, en mikil fækkun starfsmanna hefur verið þar að undanförnu.
Eftir því sem næst verður komist hafa eigendur Selóss ákveðið að hætta framleiðslu á Selfossi og hyggja á innflutning í staðinn. Fyrirtækið hefur verið talsvert umsvifamikið í framleiðslu glugga, hurða og innréttinga um árabil.
Heimildir Sunnlenska herma að húsnæði og verkstæði fari í söluferli og mögulega verði gluggaverksmiðjuhlutinn seldur sérstaklega.
Af því að hermt er hefur verkefnastaða fyrirtækisins verið ágæt en ávinningur af starfseminni ekki verið í samræmi við væntingar rekstraraðila.