Starfsgreinasamband Íslands sendi í gær áskorun til allra sveitarfélaga landsins um þátttöku í þjóðarsátt um verðstöðugleika.
Forsendur gildandi kjarasamninga eru brostnar og nú standa yfir viðræður um viðbrögð við forsendubrestinum. SGS telur brýnt að brugðist verði við með sameiginlegu átaki allra lykilaðila samfélagsins, þjóðarsátt um verðstöðugleika.
Markmiðið er skýrt: Að ná niður verðbólgu og vöxtum og skapa þannig skilyrði fyrir því að kjarasamningar haldi.
SGS skorar á sveitarfélögin að skuldbinda sig til að halda aftur af gjaldskrárhækkunum og sjá til þess að gjaldskrár þeirra og fyrirtækja í þeirra eigu hækki ekki um meira en 2,5% það sem eftir lifir gildandi kjarasamninga.
Launafólk hefur þegar lagt sitt af mörkum með gerð langtímakjarasamninga sem byggðust á hóflegum launahækkunum. SGS gerir kröfu um að aðrir leggi líka sitt af mörkum, ábyrgð og hófsemi verði að gilda fyrir alla þá sem áhrif hafa á verðmyndun. Ávinningurinn af lægri verðbólgu og vöxtum skilar sér til heimilanna, sveitarfélaganna, ríkissjóðs og fyrirtækjanna. Það eru því sameiginlegir hagsmunir samfélagsins alls að átakið takist.
SGS hefur óskað eftir skriflegu svari frá hverju sveitarfélagi um hvort það sé reiðubúið að taka þátt í þjóðarsátt um verðstöðugleika. Sambandið mun safna svörunum saman og halda utan um upplýsingar um þau sveitarfélög sem eru tilbúin að taka þátt í þessari vegferð.