Framkvæmdir við viðbyggingu íþróttahússins í Hveragerði halda áfram en síðastliðinn föstudag var fyrsta sperran reist og markar það mikilvægan áfanga í uppbyggingunni.
Á næstu vikum mun uppsetning stálvirkis halda áfram en gert er ráð fyrir að viðbyggingin, sem er samtals um 1.800m2 að flatarmáli, verði fokheld fyrir 15. desember næstkomandi.
Verkið sem nú er í gangi er fyrsta útboðsverk af a.m.k. þremur í 1. áfanga viðbyggingarinnar. Næst verður boðin út utanhússklæðning ásamt lóðarfrágangi og síðan frágangur innanhúss.
Ekki hefur verið tekin ákvörðun um hvenær þessi verk verða boðin út en gert hefur verið ráð fyrir því að viðbyggingin verði tekin í notkun veturinn 2027-2028.