Lögreglan upplýsti innbrot á lögreglustöðina á Selfossi um síðustu helgi eftir húsleit á gistiheimili í bænum.
Lögreglan hafði fengið upplýsingar um að á gistiheimilinu væri maður sem væri að selja fíkniefni. Lögreglan gerði húsleit í herbergi mannsins og þegar þangað var komið var maðurinn ekki á staðnum en fannst, auk fíkniefna, ýmis búnaður frá lögreglu.
Við athugun kom í ljós að brotist hafði verið inn í bílskúr lögreglunnar við Árveg og búnaðurinn tekinn þaðan. Meðal þess var fatnaður óeirðahóps lögreglunnar.
Lýst var eftir manninum og fann lögreglan á höfuðborgarsvæðinu hann í Reykjavík og á dvalarstað hans þar fannst meira af fíkniefnum.
Maðurinn, sem er 27 ára og góðkunningi lögreglunnar, var fluttur til yfirheyrslu á Selfossi. Þar viðurkenndi hann að eiga þátt í málinu og var munum lögreglunnar komið til skila.
Málið telst upplýst og verður maðurinn ákærður í framhaldinu.