Brauðtertu- og ostakökukeppni Kaffi Krúsar og Konungskaffi verður haldin sunnudaginn 7. júní næstkomandi, á sjálfan Sjómannadaginn, í miðbæ Selfoss.
Nú þegar hafa fjölmargir skráð sig í þessa geysivinsælu keppni sem hefur verið haldin árlega síðan 2024. Keppnin hófst þó fyrir tólf árum á Kaffi Krús sem einföld ostakökukeppni en fyrir tveimur árum ákváðu Kaffi Krús og Konungskaffi að sameina krafta sína og framkvæma eina stóra kökukeppni. Hefur keppnin þróast í einn stærsta kökuviðburð landsins.
Fyrirkomulagið er með sama sniði og áður: Keppendur skrá sig í keppnina, útbúa kökuna sína heima og mæta með hana á keppnisstað þar sem dómnefnd smakkar og velur síðan vinningskökurnar.
Var með tilbúnar kökur frá Gunnu Jóns
Tómas Þóroddsson, veitingamaður og eigandi Kaffi Krúsar, er vel stemmdur fyrir keppninni en hann er einn af þeim sem verður í dómnefnd. Tómas rifjar upp við sunnlenska.is þegar kökukeppnin var haldin í fyrsta sinn.
„Þegar ostakökukeppnin var haldin fyrst þá vorum við stressuð hvort einhver myndi taka þátt í þessari vitleysu, þannig að ég lét mömmu gera þrjár kökur og var með þær tilbúnar ef enginn myndi taka þátt. Þá áttu þær að vera frá Gunnu Jóns og einhverjum skálduðum nöfnum,“ segir Tómas og hlær dátt.
Fyrsta árið komu sex kökur þannig að ekki var þörf á kökunum frá Ellu, mömmu Tómasar. „Ég setti mömmu í dómnefndina í staðinn,“ segir Tómas og hlær.
Tómas segir að karlmaður hafi aldrei unnið kökukeppnina en í ár sé einn karlmaður nú þegar búinn að skrá sig og vonast hann til að þeim fjölgi enn frekar. Þess má geta að keppendur í kökukeppninni hafa verið víðsvegar af landinu. Sú sem átti bestu brauðtertuna í fyrra var til dæmis frá Akureyri.
Í fyrra voru 17 keppendur sem tóku þátt með alls 23 kökur en ostakökurnar voru þar í meirihluta.
300 manns horfðu á keppnina
Kökukeppnin hefur orðið vinsælli með árunum og eftir að Konungskaffi og Kaffi Krús ákváðu að leiða saman hesta sína óx keppninni fiskur um hrygg. Ísak Eldjárn, markaðsstjóri Kaffi Krúsar, segir að vinsældirnar hafi komið á óvart.
„Við áttum ekki von á því að kökukeppnin yrði svona vinsæl eða myndi hafa svona mikið aðdráttarafl fyrir gesti og gangandi. Við erum eiginlega bara rosalega hissa. Það mættu 300 manns til þess að horfa á í fyrra. Erlendu ferðamennirnir höfðu sérstaklega gaman af þessu,“ segir Ísak en ef veður leyfir þá verður keppniskökunum í ár stillt upp á borð fyrir utan Konungskaffi eins og undanfarin ár.
Veitt verða verðlaun fyrir bestu ostakökuna, bestu brauðtertuna og fallegustu kökuna. Í verðlaun eru ostakörfur frá MS og hótelgisting á Hótel Geysi, hótelgisting á Hótel Vík og hótelgisting á Hótel Örk. Að auki fá allir keppendur gjafabréf frá Kaffi Krús og Konungskaffi.
Besta ostakakan mun svo verða til sölu á Kaffi Krús og besta brauðtertan verður til sölu á Konungskaffi.
Hægt er að skrá sig í keppnina hér.