Stærsti humar sem veiðst hefur við Ísland

Jón á Hofi landaði stærsta humri sem veiðst og mælst hefur hér við land hjá Ramma í Þorlákshöfn síðastliðinn fimmtudag. Humarinn var veiddur í Selvoginum.

Lengdin á humrinum í heild er hálfur meter og hann vigtar 490 grömm. Hausinn er mældur frá augntóftum aftur að hala og mældist búkurinn 88 mm en fyrra met var 81 mm humar sem veiddist fyrir um það bil tíu árum síðan. “Íslandsmetið” var staðfest af starfsmanni Hafrannsóknarstofnunar í Þorlákshöfn, en hann skoðar flestar landanir af humarbátunum sem landa þar.

“Litli” humarinn á myndinni flokkast í 1. flokk, er 87 grömm, sem er meðalstærð þess sem verið er að veiða og vinna hjá Ramma þetta árið.

Frá þessu er greint á heimasíðu Ramma.