Lögregla, slökkvi- og sjúkralið ásamt læknum og hjúkrunarfólki var kallað að íbúðarhúsi í Réttarheiði í Hveragerði kl.16:42 í dag þar sem sprenging hafði orðið í húsinu.
Sjö einstaklingar voru í húsinu, hjón með börn sín og barnabörn, og brenndust þau öll eitthvað. Maður á sextugsaldri og drengur fæddur 1997 voru fluttir á sjúkrahús í Reykjavík með 2 stigs bruna en aðrir voru fluttir á sjúkrahúsið á Selfossi til aðhlynningar.
Þá brenndist heimilishundurinn einnig eitthvað og verður leitað til dýralæknis með hann.
Sprengingin er rakin til etanol arins sem nýlega var settur upp í húsinu. Nokkurt tjón er á innanstokksmunum en húsnæðið sjálft er lítið skemmt.
Björgunarlið er enn á vettvangi ásamt rannsóknarlögreglu.