Björgunarsveitin Súlur, sem nú sinnir hálendisvakt Landsbjargar í Landmannalaugum, var kölluð til á laugardag vegna göngumanns sem hafði fallið í brekku á Laugaveginum, milli Landmannalauga og Hrafntinnuskers.
Hinn slasaði hafði náð að koma sér af eigin rammleik í Höskuldsskála í Hrafntinnuskeri en hafði slasast á öxl og gat ekki haldið áfram för. Veður var leiðinlegt, þoka og dimmviðri. Þyrla Landhelgisgæslunnar var ekki langt undan á æfingaflugi en gat ekki lent í Hrafntinnuskeri vegna veðuraðstæðna.
Súlur héldu því í Hrafntinnusker á bílum og sótti manninn og flutti hann til móts við sjúkrabíl sem kom frá Hvolsvelli. Talsverður snjór var enn á leiðinni sem liggur í um 1.100 metra hæð og tafði það för björgunarsveitarinnar.
Aðstæður á Laugaveginum eru sömuleiðis með erfiðara móti á þessum slóðum, mikill snjór og bleyta sem getur reynst göngufólki erfiður farartálmi.