Halla Hrund Logadóttir, alþingismaður, hefur síðustu mánuðina sett saman ör-þætti á Facebook þar sem hún fjallar um ýmsa hluti sem hún elskar við Ísland.
Fyrr í sumar birti hún meðal annars þætti um bændur, kalda vatnið, flóru Íslands og jarðhitann en í nýjasta þættinum, sem sjá má hér neðst í fréttinni, heimsækir hún Sólheima í Grímsnesi.
„Ég fékk einstakar móttökur á Sólheimum en samfélagið þar endurspeglar að mínu mati einfaldlega allt það besta sem við finnum íslensku samfélagi; manngæsku, samvinnu og söguna um mikilvægi þess að leggja okkar af mörkum fyrir eitthvað stærra en okkur sjálf. Ég geri líka Sesselju Sigmundsdóttur, stofnanda Sólheima góð skil, en við ættum að mínu mati almennt að lyfta starfi hennar meira upp,“ segir Halla Hrund í samtali við sunnlenska.is.
Í þættinum ræðir Halla meðal annars við Karen Ósk Thomsen Sigurðardóttur, forstöðuþroskaþjálfa, og íbúana Erlu Björk Sigmundsdóttur, Kristófer Agnarsson, bræðurnar Sigtrygg og Kristján Atla Sævarssyni og Ólaf Hauksson auk þess sem hún kíkir í heimsókn á ÚPS – Útvarp Sólheima.