Alls söfnuðust 980 þúsund krónur á styrktartónleikum fyrir Sigurhæðir sem haldnir voru í mars síðastliðnum.
Rúmlega tvö hundruð manns sóttu tónleikana sem voru haldnir á Hótel Selfoss. Var það mál manna að tónleikarnir hefðu tekist einkar vel og stemningin í salnum hafi sömuleiðis verið góð.
Allir tónlistarmennirnir gáfu vinnu sína, sem og kynnirinn Anna Steinsen og viðburðastjórinn Ingveldur Gröndal. Styrktaraðilar voru Espiflöt sem gáfu blóm til tónlistarfólksins, Motivo og fjölmargir aðrir sem gáfu happadrættisvinninga, svo sem Hótel Selfoss, Tilefni, Myndlistarfélag Árnesinga, Neyðarþjálfun, Oche Reykjavík en happdrættismiðar voru innifaldir í miðaverðinu.
Ágóði af tónleikunum rennur allur til Sigurhæða. „Við hjá Sigurhæðum erum þakklát öllum þeim sem komu fram á tónleikunum, sem og öllum þeim sem keyptu miða og voru með okkur þetta kvöld,“ segir Anna Björg Stefánsdóttir, framkvæmdastjóri Sigurhæða, í stuttu samtali við sunnlenska.is
Sigurhæðir, sem er þolendamiðstöð fyrir þolendur kynbundins ofbeldis á Suðurlandi, er fyrsta og eina úrræðið sinnar tegundar á Suðurlandi og er það ætlað konum 18 ára og eldri.
