Söfnuðu meiri gögnum en væntingar stóðu til

Unnið að mælingum á botni Ölfusár í dag. sunnlenska.is/Guðmundur Karl

Björgunarfélag Árborgar, í samvinnu við sérsveit ríkislögreglustjóra og kafara Landhelgisgæslunnar, vann í dag að því að skanna botn Ölfusár, fyrir neðan Ölfusárbrú, með fjölgeislamælingum.

Samkvæmt upplýsingum frá lögreglunni á Suðurlandi komu við fyrstu greiningu upp atriði sem tilefni var til að skoða betur og reyndist unnt að útiloka sum þeirra með málmleitartæki og með því að setja GoPro myndavélar niður á þeim hnitum í ánni.

Önnur atriði gefa tilefni til frekari skoðunar þar sem straumþungi, dýpi og grugg kom í veg fyrir að unnt væri að sannreyna með fullri vissu hvað þar væri.

Lögreglan segir að búið sé að safna umtalsverðu af gögnum og í raun mun meiri en væntingar stóðu til. Næsta verk er að tengja saman gögnin úr hverri ferð með skannann og sjá hvort eitthvað kemur í ljós þar sem gefur tilefni til frekari skoðunar. Þess má vænta að sú vinna taki alla næstu viku.

Aðstæður á og við Ölfusá voru mjög góðar í dag og veðrið gott. Lögreglan vill þakka þeim sem unnu að verkefninu fyrir frábæra vinnu við krefjandi aðstæður.