Nemendafélag Fjölbrautaskóla Suðurlands afhenti styrktarfélaginu Börn með krabbamein styrk upp á 855 þúsund krónur í hádeginu í dag.
Vert er að geta þess að þegar styrkurinn var afhentur í íþróttahúsinu Iðu á Selfossi í dag, þá var búið að safna 720 þúsund krónum. Eftir að söfnuninni var formlega lokið bættist meira við og hún stendur nú í 855 þúsund krónum.
NFSu hefur staðið fyrir góðgerðarviku alla þessa viku þar sem nemendur FSu skoruðu á hvert annað, kennara og starfsfólk skólans með það að markmiði að safna fé fyrir Börn með krabbamein.
Sem dæmi voru augabrúnir aflitaðar, fólk var rjómað, hár var litað bleikt, fólk var gatað á hinum ýmsu stöðum, keppt var í skyrglímu og skriðið út í Bónus – svo fátt eitt sé nefnt.
Starfsfólk skólans lét ekki sitt eftir liggja í áskorunum, til að mynda fór Soffía Sveinsdóttir, skólameistari, ríðandi á dótahesti um skólann, Karl Hoffritz, húsvörður, mætti sem egypskur faraó og raunfræðikennarar mættu í kuldagöllum í skólann. Þessi upptalning er engan veginn endanleg og voru bæði nemendur skólans duglegir að skora á hvert annað og taka áskorunum.
Einn af hápunktum söfnunarinnar var þegar Kjartan rakari og þekktasti Arsenalmaður landsins klæddist Liverpool-treyju þegar söfnunin náði 520.000 krónum.
Nemendur FSU eiga gott hrós skilið
„Þessi vika er búin að ganga mjög vel. Það eru allir búnir að vera mjög duglegir að taka þátt í áskorunum, skora á sjálfa sig, skora á vini sína og kennarana. Þetta er búið að ganga eins og í sögu. Það er ótrúlega góð tilfinning og mikil hlýja í hjartað að ná að safna svona miklu og að vita að þetta sé að fara beint til góðs málefnis. Nemendur FSu eru algjörar fyrirmyndir og eiga gott hrós skilið,“ segir Guðrún Birna Kjartansdóttir, formaður NFSu í samtali við sunnlenska.is.