Fjórir drengir í 4. bekk á Selfossi söfnuðu dósum og flöskum fyrir Krabbameinsfélag Árnessýslu og skiluðu afrakstrinum til félagsins í dag. Alls söfnuðu þeir 40.000 krónum en þetta er í annað sinn sem þeir styrkja félagið með þessum hætti.
Þessir duglegu drengir heita Gunnar Vilberg Stefánsson, Elvar Elí Hilmarsson, Elimar Leví Árnason og Elmar Andri Bragason.
„Við höfðum bara ekki neitt að gera þannig að við ákváðum að safna dósum fyrir Krabbameinsfélagið,“ segir Elmar Andri í samtali við sunnlenska.is.
„Okkur datt bara strax í hug að safna fyrir Krabbameinsfélagið. Síðast þegar við vorum að safna dósum þá var bleikur október og þess vegna söfnuðum við fyrir Krabbameinsfélagið,“ segir Elmar Andri og vinirnir bæta við að það hafi aðeins tekið þá tvo daga að safna dósunum en þeir gengu á milli húsa á Selfossi og bönkuðu uppá. Alls staðar var þeim vel tekið.
Vinirnir voru kátir og glaðir þegar þeir afhentu Krabbameinsfélaginu söfnunarféð og sögðu við blaðamann sunnlenska.is að þeim liði mjög vel með að afhenda félaginu þennan styrk. „Maður er með smá fiðring í maganum“ segir Elimar Leví að lokum.
Mikilvægt að vitundin sé til staðar
Svanhildur Ólafsdóttir, formaður Krabbameinsfélags Árnessýslu, var að vonum afar þakklát fyrir styrkinn sem vinirnir afhentu.
„Það er að aukast að krakkar velji að styrkja Krabbameinsfélagið og það segir líka aðeins vitund krakka um starfsemi félagsins, að hún sé til staðar í samfélaginu.“
„Sumir kannski þekkja einhvern sem hefur þurft á þjónustu félagsins að halda. Mér finnst þetta svo ofboðslega mikilvægt, líka upp á framtíð félagsins að gera. Það er gaman að fá krakkana í hús og gaman að hitta þau og allir svona styrkir skipta félagið máli,“ segir Svanhildur ennfremur.