Fimm öflugir einstaklingar hlupu í Reykjavíkurmaraþoni Íslandsbanka þann 22. ágúst síðastliðinn og söfnuðu áheitum til styrktar Krabbameinsfélags Árnessýslu. Samtals söfnuðu þau 355.035 kr. sem renna óskipt í þjónustu við félagsmenn í Árnessýslu.
Hlaupararnir hafa allir tengingu við krabbamein, ýmist sem aðstandendur eða hafa sjálfir greinst með krabbamein og hafa nýtt þjónustu og starfsemi félagsins.
„Okkur þykir vænt um að félagið okkar komi upp í huga fólksins þegar það velur sér málefni til að styrkja. Við leggjum okkur fram við að veita persónulegan stuðning og faglega þjónustu. Okkur þótti við hæfi að bjóða hlauparana til okkar á Eyraveginn og þakka þeim í persónu fyrir þeirra framlag til starfseminnar,“ segir Svanhildur Ólafsdóttir, formaður félagsins, í samtali við sunnlenska.is.