Talsverður erill hefur verið í dag hjá lögreglu og björgunarsveitum á Suðurlandi vegna óveðursins sem gengur nú yfir. Aðgerðastjórn var virkjuð í hádeginu vegna fjölda útkalla á björgunarsveitir í Árnessýslu og Rangárvallasýslu.
Aðstoða þurfti ökumenn sem voru fastir á Hellisheiði og Þrengslum. Meðal annars þurfti að losa snjóruðningstæki og eina rútu. Meðal annars var notast við snjóbíl Björgunarfélags Árborgar til að losa um bíla og koma fólki niður úr Þrengslunum.
Þá var töluvert af bílum í þjóðgarðinum á Þingvöllum sem áttu í vandræðum með að komast þaðan. Björgunarsveitir fylgdu bílalestinni til byggða.
Eitthvað hefur verið um foktjón. Meðal annars sprakk stöðuhýsi í Rangárvallasýslu og nokkrar tilkynningar hafa borist um lausar þakplötur, meðal annars á byggingarsvæði í Þorlákshöfn. Björgunarsveitir á Hellu og Hvolsvelli voru einnig kallaðar út til að bregðast við foktjóni nokkuð víða í sýslunni, þar sem þakplötur og klæðing fuku af húsum.
Í tilkynningu frá lögreglunni á Suðurlandi er það ítrekað að fólk skoði veðurspá og færð á vegum, auk þess að tryggja lausamuni.
Appelsínugul viðvörun er í gildi á Suðurlandi til klukkan 20 í kvöld og þá tekur við gul viðvörun til miðnættis.