Snjóruðningsbíll á leið upp Kambana gjöreyðilagðist þegar eldur kom upp í bílnum um klukkan hálffimm í dag.
„Þetta er vörubíll með snjótönn og tilheyrandi búnaði. Hann varð alelda og mínir menn eru að ljúka slökkvistarfi í þessum töluðu orðum. Þetta er stórt tæki og það verður mikill eldur í þessu og svartur reykur,“ sagði Pétur Pétursson, slökkviliðsstjóri Brunavarna Árnessýslu, í samtali við sunnlenska.is um klukkan 17.
Ekki urðu slys á fólki en bílstjórinn náði að forða sér út úr bílnum í tæka tíð. Suðurlandsvegur er lokaður vegna þessa og segir Pétur að talsverðar umferðartafir hafi verið á vettvangi. Hreinsunarstarf mun væntanlega taka einhvern tíma þar sem fjarlægja þarf bílinn af staðnum.
