Snarræði slökkviliðs bjargaði miklu

Talsvert tjón varð þegar eldur kom upp í sumarhúsi í Miðdal austan við Laugarvatn laust fyrir klukkan 18 í dag.

Nágranni tilkynnti Neyðarlínunni um reyk frá húsinu og voru slökkviliðsmenn Brunavarna Árnessýslu á Laugarvatni snöggir á vettvang.

Snarræði slökkviliðsins bjargaði því að ekki fór verr því þegar þeir komu á staðinn var töluverður eldur í utanáliggjandi geymslu auk þess sem eldur var kominn í þak og inn í húsið.

„Okkar menn á Laugarvatni voru mjög snöggir á staðinn og það skipti sköpum í þessu tilviki. Tjónið er talsvert en það náðist að bjarga húsinu,“ sagði Þórir Tryggvason, varðstjóri hjá Brunavörnum Árnessýslu, í samtali við sunnlenska.is.

Auk Laugvetninga voru kallaðir út slökkviliðsmenn frá Reykholti og Flúðum, til þess að tryggja vatnsöflun og gekk slökkvistarf vel að sögn Þóris.