Slökkviliðsmenn á straumvatnsæfingu

Síðastliðin laugardag héldu meðlimir Björgunarfélags Árborgar straumvatnsæfingu fyrir slökkviliðsmenn Brunavarna Árnessýslu.

Æfingin byrjaði á bóklegri yfirferð í kennslusal slökkviliðsins í Björgunarmiðstöðinni á Selfossi en síðan var haldið í hinar ýmsu æfingar í Ölfusá.

Í frétt á heimasíðu BÁ segir að faglega hafi verið staðið að námskeiðinu og eiga björgunarfélagsmenn miklar þakkir skilið fyrir þetta frábæra framtak þeirra.

Víða eru straumvötn í Árnessýslu og því mikilvægt að björgunaraðilar hafi skilning á því sem þarf að framkvæma þegar að vá ber að höndum við þessar aðstæður.

Um tuttugu slökkviliðsmenn tóku þátt í æfingunni frá ýmsum af hinum átta slökkviliðsstöðvum sem Brunavarnir Árnessýslu reka.