Um klukkan 20 í gærkvöldi voru björgunarsveitirnar Ingunn á Laugarvatni, Tintron í Grímsnesi og Björgunarfélag Árborgar kallaðar út á hæsta forgangi vegna slasaðs einstaklings við Davíðsgjá, sem er við austanverða Vatnsvík í Þingvallavatni.
Þar hafði hópur verið við sund í gjánni og einn þeirra lenti í gjótu og slasaðist nokkuð á fæti, með talsverðum blæðingum.
Ásamt björgunarsveitum fóru sjúkraflutningar HSU og lögreglan á vettvang. Viðbragðið var skjótt en aðeins átta mínútum eftir útkall voru bílar lagðir af stað frá öllum sveitum.
Ljóst var frá upphafi að nokkur vinni yrði að koma þeim slasaða þangað sem sjúkrabíll komst og fóru hópar strax í að koma upp línum og tryggingum til að undirbúa að koma þeim slasaða á sjúkrabörum upp úr gjánni.
Eftir að hlúð hafði verið að honum hófst sú vinna við að bera hann upp úr gjánni og að sjúkrabíl en fara þurfti á annað hundrað metra yfir úfið hraun og kjarri vaxið land. Þegar búið var að lyfta börunum upp úr gjánni, þar sem hópur björgunarmanna leysti það með mikilli samvinnu, var hægt að koma hjóli undir sjúkrabörurnar og létta undir síðasta spölinn.
Um klukkan 21:30 var sá slasaði kominn í sjúkrabíl og björgunarsveitarfólk hélt heim að loknum frágangi á vettvangi.