Slasaður göngumaður við Álftavatn

Lögreglumenn frá Hvolsvelli fengu tilkynningu um kl. 16 í gær að erlendur ferðamaður væri slasaður á hné á milli Álftavatns og Hrafntinnuskers, símtalið manninn slitnaði svo áður en fékkst upp úr honum nánari staðsetning.

Lögreglumenn, ásamt hálendisvakt Landsbjargar, sem stödd var í Álftavatni, og skálaverðir á svæðinu hófu eftirgrennslan eftir manninum. Eftir nokkra stund náðist símasamband við hann aftur og hafði hann þá náð að komast sjálfur í skála við Hrafntinnusker.

Meiðslin voru lítilsháttar og ætlaði hann að hvílast í skálanum og halda svo göngu.

Lögreglan nýtti góða veðrið í gær til þess að fara í hálendiseftirlit um Fjallabaksleið syðri. Ferðin sóttist vel, en því miður urðu lögreglumenn varir við nokkur hjólför utan vega á svæðinu, einnig sem mátti sjá á stöku stað hófaför eftir hestahópa.
Enn og aftur vill lögreglan á Hvolsvelli hvetja fólk til að sýna náttúrunni þá tilhlýðilegu virðingu sem hún á skilið. Búið er að gera vegi til að aka eftir og ef þeir, af einhverjum sökum, eru ekki færir hvetur lögreglan fólk til þess að fara aðrar leiðir eða snúa við.