Gestur sem heimsótti þjóðgarðinn á Þingvöllum í gær lenti í lífsháska þegar hann gekk með bakka Öxarár þar sem áin rennur út í Þingvallavatn. Snjór sem huldi vatnsgjá gaf sig þegar hann gekk þar yfir og við það féll hann niður í hyldjúpa gjánna í helkalt vatnið.
Frá þessu er greint á heimasíðu Þjóðgarðsins.
Gjáin er mjög djúp og fór viðkomandi á bólakaf í vatn en lofthiti var um -18 gráður. Samferðarmaður hans og annar nálægur gestur þjóðgarðsins komu honum til bjargar og náðu honum upp úr gjánni, holdvotum við illan leik og komust þau í bíl þeirra sem lagt hafði verið spölkorn frá.
Fólkinu var mjög brugðið en komust til síns heima, köld og holdvot en létu þjóðgarðsstarfsfólk vita þegar þau voru á leið heim til að vekja athygli á þessu.
Snjó hefur kyngt niður í þjóðgarðinum undanfarinn mánuð og skefur snjó yfir gjár sem eru óteljandi í þjóðgarðinum og því geta slíkar hættur leynst víða. Í frétt þjóðgarðsins eru gestir eindregið hvattir til að fara alltaf með ítrustu gát um þjóðgarðinn og fara ekki út fyrir stíga og halda sig á sýnilegum slóðum.
Starfsfólk þjóðgarðsins mun skoða aðstæður við þessa gjá og meta aðstæður og hvernig verði brugðist frekar við.