Skuldahlutfallið komið niður fyrir 150%

Skuldahlutfall Sveitarfélagsins Ölfuss er komið niður fyrir 150% og segir Ólafur Örn Ólafsson, sveitarstjóri, það ánægjuleg tíðindi.

Ársreikningur ársins 2011 var samþykktur á síðasta bæjarráðsfundi og vísað til endurskoðunar og afgreiðslu bæjarstjórnar. Lítilsháttar tap mun hafa verið á sveitasjóði en samstæðureikningur nálægt jafnvægi.

“Við teljum að þetta sé allt á réttri leið. Við höfum lækkað verulega skuldir og kostnaður vegna yfirdráttar hefur lækkað sömuleiðis,” segir Ólafur Örn í samtali við Sunnlenska.

Horfur eru á að ráðist verði í nokkrar framkvæmdir innan skamms og verður leikskólinn stækkaður með byggingu tveggja nýrra deilda.