Skrifað undir Suðurlandsstrætó

Í dag var undirritaður samningur á milli Samtaka sunnlenskra sveitarfélaga (SASS) og Hópbíla hf. um almenningssamgöngur á starfssvæði SASS og milli Suðurlands og höfuðborgarsvæðisins.

Samningurinn tekur gildi frá og með næstu áramótum en Elfa Dögg Þórðardóttir formaður SASS og Gísli Friðjónsson forstjóri Hópbíla undirrituðu hann. Um verður að ræða eitt samtengt almenningssamgöngukerfi sem nær frá Reykjavík austur að Höfn í Hornafirði.

Samningurinn felur í sér eflingu almenningssamgangna frá því sem verið hefur og þær verða nú allar á einni hendi og akstur og gjaldskrá samræmd. Breytingin felur m.a. í sér að fleiri eiga möguleika að sækja vinnu til höfuðborgarsvæðisins og öfugt. Þegar líður á næsta ár verða teknir í notkun nýir vagnar. Vagnarnir verða auðkenndir í sérstökum litum og í þeim internettenging til þæginda fyrir farþega. Sætaframboð verður þó aukið strax eftir áramót, tuttugu sæta aukning verður í öllum bílum og einni ferð bætt við snemma morguns frá Reykjavík.

Leiðakerfið og þjónusta við farþega verður kynnt sérstaklega á næstu vikum.