Félög eldri borgara í Uppsveitum Árnessýslu skora á stjórn Heilbrigðisstofnunar Suðurlands, allar sveitarstjórnir á svæðinu, Landlæknisembættið, Heilbrigðisráðuneytið, heilbrigðisráðherra og innviðaráðherra að þau taki öll höndum saman og vinni hratt og vel að því að tryggja öryggi íbúa, sumarhúsaeigenda og ekki síst eldri borgara með því að bæta heilbrigðisþjónustu í Uppsveitunum.
Til þess segja félögin að þurfi að tryggja og verja stöðu heilsugæslunnar í Uppsveitum, fastráða lækna og tryggja bakvaktir þeirra í Laugarási og tryggja fasta viðveru sjúkrabíla og bráðaliða allt árið um kring.
Einnig er skorað á yfirvöld að fylgja Heilbrigðisstefnu til ársins 2030, þar sem meðal annars kemur fram að „til að tryggja að heilbrigðisþjónustan sé í samræmi við þarfir og væntingar notenda þurfi að kanna reynslu og viðhorf notenda reglubundið með þjónustukönnunum.
Undir þessa áskorun rita formenn Félags eldri borgara í Biskupstungum, Félagsins 60+ í Laugardal, Félags eldri Hrunamanna og Félags eldri borgara í Skeiða- og Gnúpverjahreppi.