Velferðarþjónusta Árborgar hefur sent félags- og húsnæðismálaráðherra áskorun um að endurskoða þá ákvörðun að framlengja ekki styrk til tengiráðgjafar hjá sveitarfélaginu.
Verkefnið var sett á laggirnar til að efla félagsleg tengsl, auka virkni og styðja eldra fólk til þátttöku í samfélaginu.
Þrátt fyrir góðan árangur hefur Félags- og húsnæðismálaráðuneytið ákveðið að framlengja ekki styrk til stöðugildisins. Með breytingum á starfsskipulagi innan Árborgar hefur þó tekist að tryggja áframhaldandi tengiráðgjöf, að hluta til, út árið 2026.
Tengiráðgjöfin hófst í maí 2024 og frá þeim tíma hafa 66 einstaklingar á aldrinum 45–90 ára fengið tengiráðgjöf. Þjónustan felst meðal annars í því að fylgja fólki í ný úrræði í fyrsta skipti, veita upplýsingar um stuðning og þjónustu, styrkja tengsl við nærumhverfi og styðja við aukna virkni.
Meira en helmingur þeirra sem notið hafa þjónustunnar hefur aukið félagslega þátttöku sína og tengsl við samfélagið.
Tengiráðgjöf er unnin í nánu samstarfi við félagslega stuðningsþjónustu sem sinnir um 100 innlitum daglega á heimilum íbúa. Áhersla hefur verið lögð á að draga úr félagslegri einangrun, sem er einn stærsti áhættuþáttur hnignunar og skertrar lífsgæða.
Auk einstaklingsráðgjafar hefur tengiráðgjafi staðið að fræðslu og forvörnum, tekið þátt í þróunarverkefnum tengdum heilbrigðri öldrun og stutt við hópamyndun, svo sem danshóp 60+ og verkefnið „Karlar í uppsölum“. Með því er ekki aðeins unnið gegn einangrun heldur einnig skapað rými fyrir ný tengsl, aukið sjálfstraust og meiri lífsgleði.