Skoða sameiningu sveitarfélaga milli Þjórsár og Gígjukvíslar

Hvolsvöllur. Ljósmynd/Mats Wibe Lund

Sveitarstjórnir Ásahrepps, Rangárþings ytra, Rangárþings eystra, Mýrdalshrepps og Skaftárhrepps hafa skipað verkefnishóp til að kanna hvaða áhrif sameining sveitarfélaganna myndi hafa á rekstur og þjónustu sveitarfélaganna. Verkefnið hefur hlotið nafnið „Sveitarfélagið Suðurland“.

Heimasíða verkefnisins er komin í loftið en þar er að finna helstu upplýsingar fyrir íbúa sveitarfélaganna og aðra áhugasama um verkefnið. Þá er hægt að senda inn fyrirspurnir og verða svör birt á síðunni.

Markmið verkefnishópsins er að gera tillögu að því til hlutaðeigandi sveitarstjórna hvort hefja skuli formlegar sameiningarviðræður. Gert er ráð fyrir að tillaga verkefnishópsins liggi fyrir í lok október næstkomandi, þannig að sveitarstjórnir geti tekið ákvörðun í nóvember.

Verkefnishópurinn mun leita svara við ýmsum spurningum varðandi áhrif mögulegrar sameiningar á fjármál, rekstur, stjórnsýslu og þjónustu við íbúa svæðisins til að meta hvort hag íbúanna er betur borgið í sameinuðu sveitarfélagi en í núverandi skipulagi. Í haust verður boðað til íbúafunda í hverju og einu sveitarfélagi þar sem leitað verður sjónarmiða íbúa og í framhaldinu framkvæmd skoðanakönnun.

Verði ákveðið að hefja formlegar sameiningarviðræður munu íbúar ganga til kosninga um sameiningartillögu á árinu 2021.