Skoði að hætta sorpbrennslu

Ráðherra hefur beint því til sveitarstjórnar Skaftárhrepps að skoðaðir verði möguleikar á að hætta eða draga verulega úr sorpbrennslu á Klaustri þar til niðurstöður rannsókna liggja fyrir.

Fram kemur á vef umhverfisráðuneytisins, að bréf þessa efnis hafi verið send í dag. Sé óskin sett fram í kjölfar mælinga á díoxíni úr búfjárafurðum og fóðri sem tekin voru í nágrenni annara stöðva, á Vestfjörðum og í Öræfum.

Einnig hefur Svandís Svavarsdóttir ákveðið að hraða afgreiðslu tillagna Umhverfisstofnunar um auknar kröfur í reglugerð til eldri sorpbrennslustöðva. Í þeim yrði meðal annars kveðið á um að sorpbrennslustöðvar, sem enn starfa samkvæmt undanþágu frá árinu 2003, fái afmarkaðan tíma til að uppfylla ströngustu skilyrði fyrir sorpbrennslur en loki ella.

Matvælastofnun og Sóttvarnalæknir munu efna til borgarafunda með íbúum sveitarfélaga í nágrenni sorpbrennslustöðva og verður fyrsti fundurinn haldinn á morgun á Kirkjubæjarklaustri.