Byggðaráð Rangárþings ytra samþykkti á fundi sínum í morgun að skipa vinnuhóp um framtíðarskipulag íþróttavallarsvæða í sveitarfélaginu.
Ástþór Jón Ragnheiðarson verður formaður hópsins, en auk hans eru Erla Sigríður Sigurðardóttir, Sóley Margeirsdóttir og Heiðar Óli Guðmundsson skipuð í hópinn ásamt því að heilsu- íþrótta- og tómstundafulltrúi sveitarfélagsins verður starfsmaður hópsins.
Vinnuhópnum er ætlað að vinna að stefnu og koma með hugmyndir að því hvernig útiíþróttaaðstaða í Rangárþingi ytra á að byggjast upp, ásamt því að koma með grófa kostnaðaráætlun á hugmyndum. Meðal verkefna hópsins verður meðal annars að koma með framtíðarsýn fyrir nýjan íþróttavöll á Hellu og útiíþróttaaðstöðu á Hellu, í Þykkvabæ og á Laugalandi.
Niðurstöður þessarar vinnu eiga að liggja fyrir ekki síðar en 1. nóvember næstkomandi.