Skeiða og Gnúpverjahreppur skilaði í síðustu viku inn umsókn um rafræn skil gagna til Héraðsskjalasafns Árnesinga. Þar með er sveitarfélagið fyrst sveitarfélaga innan Héraðsskjalasafnsins til að sækja um rafræn skil á gögnum. Er þetta liður í innleiðingu sveitarfélagsins á heimsmarkmiðum sameinuðu þjóðana um skilvirkar og ábyrgar stofnanir þar sem gagnsæi er haft að leiðarljósi.
Undirbúningur fyrir þessa umsókn hefur verið töluverður undanfarna mánuði og hefur Hrönn Jónsdóttir á skrifstofu sveitarfélagsins borið hitann og þungann af þessu verkefni. Guðmunda Ólafsdóttir og Þorsteinn Tryggvi Másson hjá Héraðsskjalasafni Árnesinga hafa einnig verið sveitarfélaginu til halds og traust í þessari vinnu.
Hluti af innleiðingu þessa ferils er að taka upp og innleiða nýtt rafrænt skjalavistunarkerfi og endurskoða skjalavistunaráætlun sveitarfélagsins. Í fyrstu umferð færast allir skjalaflokkar nema bókhald yfir í rafrænt umhverfi en stefnt er að því að allir skjalaflokkar verði komnir í rafrænt umhverfi eftir eitt ár. Þannig verða gögn aðgengileg þegar á þarf að halda og varðveisla þeirra skjala sem varðveita á til frambúðar tryggð.